MANILA, Philippines - Dalawang aktibong pulis at isang dating pulis na umano’y mga tulak ng droga ang nasawi nang manlaban ito habang isisilbi ang search warrants sa kanilang mga bahay sa Sultan Kudarat kamakalawa.
Ang tatlong nasawing pulis ay kinilalang sina Mods Salendab Faisal Sidik, na ang tunay na pangalan ay natukoy na si dating SPO2 Lahmudin Salendab; PO1 Toto Alamada ng Brgy. Sinakulay, Pres. Quirino, Sultan Kudarat at PO1 Ryan Mastura.
Batay sa ulat, ay isisilbi sana ng mga otoridad ang search warrants laban sa mga drug suspects at sa halip ay nanlaban sina Salendab at Alamada at napatay ang mga ito.
Narekober sa bahay ni Salendab ang isang unit caliber 9mm UZI sub-machine gun, 38 revolber at mga bala at mga cartridges.
Sumunod namang ni-raid ng pulisya ang bahay ni PO1 Mastura, subalit nanlaban ito na nasugatan na bagaman naisugod pa sa pagamutan ay nabigo ng maisalba ang buhay.