MANILA, Philippines - Isang notoryus na drug pusher ang nasawi nang ito ay manlaban sa mga elemento ng militar at Philippine Drug Enforcement Agency (PDEA) sa isang drug raid kahapon sa Brgy. Calangcanas, Maluso, Basilan.
Ang nasawing suspek ay kinilalang si Abubakar Mohammad alyas Abubakar Adali habang arestado naman ang walo pa nitong kasamahan.
Sa ulat, bandang alas-5:45 ng umaga nang isagawa ang raid ng pinagsanib na operatiba ng Marine Battalion Landing Team (MBLT) 11, 4th Special Forces Battalion ng Phil. Army at PDEA ang drug bust operation sa lugar.
Pumalag si Mohammad na agad nakipagbarilan sa arresting team na nauwi sa shootout habang nakorner naman ang walo pa nitong naarestong mga kasamahan.
Nasamsam sa operasyon ang dalawang M16 rifles, isang M2013 grenade launcher, isang caliber .22 pistol, isang rifle grenade, sari-saring rounds ng mga bala, mga magazine, pera, ilang plastic sachet ng shabu at mga drug paraphernalia.