MANILA, Philippines - Isang 41-anyos na Japanese national ang na-hulidap at natangayan ng P120,000 halaga ng pera, cellphone, laptop, camera at iba pang kagamitan sa Ermita, Maynila, kamakalawa ng hapon.
Sa reklamong idinulog sa Manila Police District-General Assignment Section, inilahad ng biktimang si Handa Makasaki, ng Kyoto, Japan, nanunuluyan sa Tune Hotel, na matatagpuan sa Mabini st., Ermita, dakong alas-4:00 ng hapon nitong Sabado nang sumilong siya sa waiting shed na malapit sa nasabing hotel nang lapitan ng nakaunipormeng pulis.
Pinagsabihan umano siya na bawal ang tumambay doon at hinanapan siya ng passport at pinapunta sa nakaparadang sasakyan.
Nang papasukin umano sa isang Revo (may kumbinasyong itim at puti) ay may tatlong lalaki na sakay at kinuha ang kanyang mga kagamitan at wallet, saka siya inutusang bumaba habang nakatutok umano ang baril.