MANILA, Philippines - Nadakip na rin ng mga otoridad ang isang bagitong pulis na holdaper at tinaguriang most wanted cop na sangkot sa serye ng panghoholdap sa mga dayuhan sa Ermita, Maynila kamakalawa ng gabi.
Ang suspek ay kinilalang si PO1 Reggie Dominguez, dating nakatalagasa sa Manila Police District (MPD)-Station 9.
Batay sa ulat, sa pagitan ng alas-6:00-8:00 ng gabi nang maaresto ang suspek sa bahay ng kanyang kinakasama sa Paz St., Paco, Maynila ng mga miyembro ng Special Action Force (SAF).
Si PO1 Dominguez ay may limang standing warrant of arrest kaugnay sa mga isinampang reklamo laban sa kanya ng kanyang mga nabiktima.
Huling biktima umano ni Dominguez ay isang Hapon na natangayan niya ng P1.8 milyon matapos sitahin at kunin ang dalang bag kamakailan.
Isa din umano sa naging biktima ni Dominguez ay ang American national na si Adam Miller, 54 noong Mayo 17 kung saan natangay niya ang $4,000 dolyar nakalagay sa pitaka ng biktima.