La Trouppei puntirya ang 2nd Leg Triple Crown

MANILA, Philippines — Impresibo ang ipinakitang husay ng La Trouppei sa first leg ng PHILRACOM 2023 Triple Crown series kaya naman muling sasalang ang nasabing kabayo sa second leg na ilalarga sa Metro Turf, Malvar sa Tanauan City, Batangas sa darating na Linggo.

May distansyang 1,800 meter race, inaasahang makakatapat ng anak nina Brigand at Betty H na La Trouppei ang karibal na Jaguar.

Naungusan ng La Trouppei ang Jaguar sa first leg matapos irehistro ng winning horse ang tiyempong 1:38.8 sa 1,600 meter race, tumersero noon ang Istulen Ola.

Bukod sa Jaguar at Istulen Ola, makakatagisan ng bilis ng La Trouppei ang ibang nagsaad ng pagsali na Easy Way, Secretary, Going East, Earli Boating at Save My Savings.

Kukubrahin ng mananalong kabayo ang P2.1M sa event na suportado ng PHILRACOM, susungkitin ng second placer ang P700,000, mapupunta ang P350,000 sa pangatlong puwesto.

Samantala, sasakyan pa rin nina star Jockey Jeffril Tagulao Zarate at class A rider John Alvin Guce ang Jaguar at Istulen Ola.