Canino, Tubu walang rivalry

MANILA, Philippines — Walang duda na sina Angel Canino ng De La Salle University at Trisha Tubu ng Adamson University ang nangunguna para sa Rookie of the Year award.

Malaki ang tulong nina Canino at Tubu para maabot ng kani-kanyang koponan ang mga maganda puwesto nito sa UAAP Season 85 women’s volleyball tournament.

Nangunguna ang La Salle na may 6-0 rekord habang may 4-2 marka naman ang Adamson para sa No. 3 spot.

Nagharap na sina Canino at Tubu kung saan nanaig ang Lady Spikers sa Lady Falcons sa pamamagitan ng 22-25, 25-14, 25-16, 25-19 desisyon.

Pinamunuan ni Canino ang La Salle matapos magpako ng 21 puntos at 17 receptions.

Sa kabilang banda, nagsumite naman si Tubu ng 13 puntos para sa Lady Falcons.

Nangunguna sina Canino at Tubu sa karera sa Rookie of the Year award.

Subalit walang nakikitang rivalry si Canino laban kay Tubu.

“I don’t really look at it that we (have rivalry) as super rookies,” ani Canino.

Mataas ang respeto ni Canino kay Tubu dahil sa husay nito sa paglalaro.

“I respect her. She has her name and I have mine. I have a huge respect for her because she has big contributions to her team. She’s not just a mere player on the court, she’s a player that you can really depend on inside the court. I really have a huge respect for her,” ani Canino.

Sunod na makakaharap ng Lady Spikers ang defending champion National University bukas kung saan itataya ng La Salle ang malinis na rekord nito.