Rakocevic pasikat agad sa Hotshots
MANILA, Philippines — Ipinalasap ng Magnolia ang ika-18 sunod na kamalasan ng Terrafirma simula noong 2021 PBA Governors’ Cup.
Humakot si European import Nikola Rakocevic ng 45 points at 25 rebounds para sa 100-92 pagbangga ng Hotshots sa Dyip sa una nilang laro sa 2022 PBA Commissioner’s Cup kahapon sa MOA Arena sa Pasay City.
Nag-ambag si Jio Jalalon ng 12 markers, 7 assists at 6 boards at may 10 points si Ian Sangalang para sa ika-14 sunod na dominasyon ng Magnolia sa Terrafirma.
“Iyong activity level niya iyon ang gusto namin eh,” sabi ni Victolero sa 24-anyos na si Rakocevic. “We just need the contribution of our locals and improve on our defense.”
Itinayo ng Hotshots ang 15-point lead, 73-58, mula sa layup ni Mark Barroca sa 5:57 minuto ng third period.
Isang 17-6 atake ang pinamunuan ni balik-import Lester Prosper, kumolekta ng 41 points at 19 rebounds, para sa 88-86 abante ng Dyip sa 6:40 minuto ng fourth quarter.
Huling hinawakan ng Terrafirma ang bentahe sa 92-91 mula sa basket ni Prosper sa 2:59 minuto kasunod ang 9-0 bomba ng Magnolia para makalayo sa 100-92 sa nalalabing 31.5 segundo.
Samantala, pinulbos ng Rain or Shine ang Barangay Ginebra, 93-71, na dumiskaril sa debut ni Jamie Malonzo para sa ‘never-say-die’ team.
Tumipa si import Steve Taylor ng 21 points, 10 rebounds at 5 assists para sa 1-1 baraha ng Elasto Painters na nagposte ng 32-point lead, 87-55, sa huling 4:15 minuto ng final canto.
- Latest