MANILA, Philippines — Ilang araw matapos ang pormal na pag-angkin ni national weightlifter Hidilyn Diaz sa pang-pitong Olympic Games berth ay nagpakitang-gilas naman si Elreen Ando na bumuhat ng dalawang silver at isang bronze medal sa women’s 64 kilogram division sa 2021 Asian Weightlifting Championships sa Tashkent, Uzbekistan.
Sumegunda ang 2019 Southeast Asian Games silver medalist sa kanyang total lift na 213kg. sa ilalim ng 228kg. ni gold medal winner Wen-Huei Chen ng Chinese Taipei kasunod si bronze medalist Sojin Han (211kg.) ng South Korea.
Ang ikalawang silver medal ni Ando ay mula sa kanyang binuhat na 119kg. sa clean & jerk habang ang bronze ay galing sa kanyang 94kg. sa snatch.
Ang 25-anyos na si Ando ang ikalawang national lifter na kumolekta ng medalya sa nasabing Olympic qualifying tournament.
Nauna nang inangkin ni Mary Flor Diaz ang tatlong silver medals sa women’s 45kg category sa kanyang total lift na 135kg. habang nagtala siyang 60kg. sa snatch at 75kg. sa clean and jerk.
Tumapos naman na pang-pito si Margaret Colonia sa women’s 59kg. division sa kanyang total lift na 176kg.
Nakatakda namang sumabak sina 2019 Asian juniors champion Vanessa Sarno, 2019 Southeast Asian Games gold medalist Kristel Macrohon at John Dexter Tabique sa kani-kanilang mga weight classes sa torneong magtatapos sa Abril 25.