MANILA, Philippines — Sa kalibre ni Pinoy world bantamweight champion John Riel Casimero, inaasahan ni challenger Duke Micah ng Ghana na magiging madugo ang kanilang bakbakan bukas (Manila time) sa Mohegan Sun Casino sa Uncasville, Connecticut.
Inihalintulad ni Micah ang kanilang laban ni Casimero sa maalamat na world heavyweight fight nina Muhammad Ali at Joe Frazier.
“This is a big opportunity to show the world who I am. I promise I would do my best in this fight. I am extremely ready to give it all,” pa-ngako ni Micah. “The fans will see it on Saturday night and they will become instant fans of my electrifying style.”
Itataya ni Casimero, may hawak na 29-4-0 win-loss-draw ring record kasama ang 20 knockouts, ang kanyang bitbit na World Boxing Organization (WBO) bantamweight title kontra kay Micah (24-0-0, 19 KOs).
Ito ang unang pagkakataon na ipagtatanggol ng tubong Ormoc City, Leyte ang kanyang WBO crown na nakamit niya matapos talunin si South African Zolani Tete via third-round KO noong Nobyembre, 2019 sa England.
Bago nagtungo sa Connecticut ay ipinagyabang ni Casimero sa social media ang kanyang malabakal na pangangatawan.
Walang ibang plano si Casimero kundi ang patulugin si Micah, kumatawan sa Ghana noong 2012 Olympic Games.
Ito ang unang laban ni Micah ngayong taon matapos umiskor ng unanimous decision win kontra kay Janiel Rivera noong Nobyembre.