MANILA, Philippines — Hindi maawat si Filipino world champion Johnriel Casimero sa paghahanda para sa nalalapit niyang unification bout laban kay Japanese fighter Naoya Inoue sa Abril 25 sa Mandalay Bay Resort and Casino sa Las Vegas, Nevada.
Dedma si Casimero sa coronavirus dahil business as usual ang kampo niya sa kanyang training camp sa Miami, Florida.
Desidido ang World Boxing Organization bantamweight champion na maagaw ang World Boxing Association at International Boxing Federation bantamweight belts na suot ni Inoue.
Kaya naman walang pahinga si Casimero sa training camp sa kabila ng kaliwa’t kanang negatibong balita sa coronavirus outbreak na kumalat na sa iba’t ibang panig ng bansa maging sa Amerika.
Sumasailalim sa matinding pagsasanay kasama si strength and conditioning coach Memo Heredia, ang beteranong trainer na humasa kay Mexican boxing great Juan Manuel Marquez.
Si Heredia ang naging katuwang ni Marquez nang talunin nito si eight-division world champion Manny Pacquiao noong 2012 sa MGM Grand Garden Arena sa Las Vegas, Nevada.
Inaasahang magtutungo sa Las Vegas ang Team Casimero para sa kanyang training camp.
Habang naghihintay ng opisyal na statement mula sa Top Rank Promotions na siyang humahawak sa laban ay walang puwang ang pagre-relax para kay Casimero.
Naghihintay pa ang Top Rank kung kakanselahin ng Nevada State Athletic Commission ang mga laban sa Abril.
Ang NSAC ang nagbibigay ng permiso sa lahat ng mga laban sa Nevada.
Sa kasalukuyan, ilang boxing fights at MMA bouts na ang kinansela sa buwan ng Marso ngunit wala pang anunsyo ang Nevada State sa mga laban sa Abril.
Kung matutuloy ito, plano ng Top Rank na gawin itong closed door event.