MANILA, Philippines — Damay-damay na dahil kanselado na rin ang prestihiyosong 2020 FIG Artistic Gymnastics Apparatus World Cup na lalahukan sana ni Filipino world champion Carlos Edriel Yulo sa Baku, Azerbaijan.
Nakatakda sana ang nasabing torneo mula sa Marso 12-15 na magsisilbing tune-up ni Yulo bago sumalang sa darating na 2020 Olympic Games na lalarga naman sa Hulyo 24 hanggang Agosto 9 sa Tokyo, Japan.
Mismong si Yulo ang nag-share ng naturang balita sa kanyang social media account.
“The finals of the FIG Apparatus World Cup in Baku have been cancelled following the decision of the government of Azerbaijan to avoid mass gatherings in the country for one month,” ayon sa ibinahaging post ni Yulo.
Gayunpaman, may nakatakda pang lahukang event si Yulo.
Ito ay ang 9th Asian Senior Championships na gaganapin sa Tokyo, Japan sa Mayo 2-5.
Kaya naman tuloy ang ensayo ni Yulo bilang paghahanda sa naturang Asian meet at pati sa Tokyo Olympics kung saan malakas ang tsansa niyang makasungkit ng gold medal sa kanyang paboritong floor exercise.
Naghari si Yulo sa naturang event noong sa 49th FIG Artistic Gymnastics World Championships na ginanap sa Stuttgart, Germany noong nakaraang taon.
Sa parehong torneo rin nakasikwat si Yulo ng tiket sa Tokyo Olympics.
Plano sana ng Gymnastics Association of the Philippines na ipadala si Yulo sa Russia para sumailalim sa matindng training camp.
Subalit tumanggi ang Russian association dahil na rin sa pangambang dulot ng coronavirus.
Puspusan na ang training ni Yulo sa Tokyo kasama si Japanese coach Munehiro Kugimiya.
Ilang mga bagong routines ang iniensayo nina Yulo at Kugimiya para sa Tokyo Olympics.