Magnolia swak sa quarterfinals
MANILA,Philippines — Ayaw na ng nagdedepensang Magnolia na magkaroon ng komplikasyon ang kanilang pagpasok sa eight-team quarterfinal round.
Hindi binitawan ng Hotshots ang kanilang hawak na double-digit lead sa second half para paluhurin ang TNT Katropang Texters, 100-93, sa 2019 PBA Governor’s Cup kahapon sa University of Southeastern Philippines Gym sa Davao City.
Humakot si PBA Best Import Romeo Travis ng 21 points, 12 rebounds at 3 assists para sa kampo ni coach Chito Victolero.
Nakabangon ang Magnolia mula sa 85-86 kabiguan sa NLEX para itaas ang baraha sa 6-5 kasabay ng pagpapalasap sa TNT Katropa ng ikatlong dikit nitong kamalasan para sa 7-3 record katabla ang Barangay Ginebra.
Nauna nang natalo ang tropa ni coach Bong Ravena laban sa NLEX, 113-126, at Ginebra, 93-96.
Nabigo na naman silang makahirit ng isa sa apat na ‘twice-to-beat’ incentive sa quarterfinals.
Nagsukatan ng lakas ang dalawang koponan sa first period bago nakawala ang Hotshots sa second quarter sa pagkuha sa 35-24 abante mula sa three-point shot ni Mark Barroca sa 8:32 minuto nito.
Ang tirada ni Chris Banchero ang lalo pang nagbaon sa Tropang Texters sa 31-53 patungo sa 41-56 pagkakaiwan sa halftime.
Nakabawi naman ang TNT Katropa sa third period sa pangunguna nina import KJ McDaniels, RR Pogoy at No. 2 overall pick Bobby Ray, Parks, Jr. para ilapit ang laro sa 45-56.
Subalit muling humataw ang Magnolia at itinarak ang 94-71 kalamangan galing sa dalawang free throws ni Ian Sangalang sa 7:04 minuto ng final canto.
Nagkaroon naman ng tirahan sina McDaniels at Marc Pingris sa huling 4:16 minuto ng final canto kung saan angat ang Hotshots sa 94-80.
Huling nakadikit ang Tropang Texters sa 88-96 mula sa drive ni Pogoy sa 2:44 minuto ng bakbakan.
Isang baseline jumper ang isinalpak ni Travis na naglayong muli sa Magnolia sa 98-88.
- Latest