MANILA, Philippines — Target ng PacificTown-Army na sundan ang kanilang huling panalo sa pagharap sa BaliPure sa pagpapatuloy ng Premier Volleyball League Season 3 Open Conference sa Malolos Sports and Convention Center sa Bulacan.
Sasabak sa giyera ang Lady Troopers nang wala si ace player Jovelyn Gonzaga, kasalukuyang kasama ng national team sa Thailand, kontra sa nagkukumahog na Water Defenders ngayong alas-4 ng hapon.
Para kay PacificTown-Army assistant coach Rico de Guzman, hindi nila puwedeng maliitin ang BaliPure kahit nasa laylayan ito ng standings.
“Hindi kami puwedeng mag-easy game doon kasi may palo sila. Malakas din ‘yung open nila lalung-lalo na kapag nagkaroon sila ng momentum,” sabi ni De Guzman, hahalili kay head coach Kungfu Reyes na nasa Thailand din para sa ASEAN Grand Prix.
“Kagaya nga ng sinabi ko, hindi kami puwedeng sumandal kay Jovelyn. Dapat magtatrabaho kami bawat isa,” dagdag pa nito.
Tatangkain naman ng Water Defenders na tuldukan ang kanilang pagsadsad.
Nalasap ng BaliPure ang ika-walong kamalasan sa 10 laro sa mga kamay ng nagdedepensang Creamline, 11-25, 15-25, 17-25.
Sa unang laro sa alas-2 ng hapon ay magtutuos naman ang Chef’s Classics at Choco Mucho.
Samantala, kinapos ang Philippine women’s national team matapos sumuko sa Indonesia, 21-25, 28-26, 25-12, 18-25, 9-15, sa 2019 ASEAN Grand Prix kahapon sa Nakhon Ratchasima sa Thailand.
Nanguna para mga Pinay si Ces Molina na may 18 points sa likod ng 16 attacks at 2 blocks, habang tumipa naman sina Majoy Baron at Kalei Mau ng 17 at 15 markers, ayon sa pagkakasunod.