MANILA, Philippines — Humirit din ng tiket sa quarterfinals si Nesthy Petecio matapos magtala ng unanimous decision win sa women’s featherweight (57 kg.) division ng 2019 Thailand Open International Boxing Championship na ginaganap sa Bangkok, Thailand.
Nakuha ng 2014 World Championships silver medallist ang 30-27, 30-27, 30-27, 29-28, 29-28 desisyon laban kay Tumurkhuyag Bo-lortuul ng Mongolia na nanalo kay Chandrakala Thapa ng Nepal.
Haharapin ni Petecio sa quarterfinals si Won Un Gyong ng North Korea na ginulantang si top seed Yin Junhua ng China sa pamamagitan ng 3-2 split decision win (29-28, 29-28, 29-28, 28-29, 27-30).
Sa pagpasok sa quarterfinals, sigurado na si Petecio ng $300 paprem-yo o katumbas ng mahigit P15,000.
Nabangasan na naman ang national team matapos mamaalam sa kontensiyon si Carlo Paalam na lumasap ng unanimous decision loss kay Wuttichai Yurachai ng Thailand sa men’s light flyweight (46-49 kg.) division.
Pumabor sa home crowd bet ang limang hurado sa iskor na 28-27, 28-27, 28-27, 29-26 at 29-26.
Nauna nang umabante sa quarterfinals si Southeast Asian Games gold champion John Marvin sa men’s flyweight (52 kg.) class kung saan makakalaban nito si Zhang Jilei ng China.
Sasalang pa sina Ian Clark Bautista (men’s bantamweight, 56 kg.) at Marjon Pianar (men’s welterweight, 69 kg.) sa kani-kanyang events.