MANILA, Philippines — Bantay-sarado ang kalusugan ni reigning World Boxing Association (WBA) regular welterweight champion Manny Pacquiao upang maiwasan ang pagkakasakit nito habang nasa training camp sa Wild Card Gym sa Los Angeles, California.
Kaya naman mas hinigpitan ni chief trainer Buboy Fernandez ang pagtanggap ng bisita partikular na ang mga posibleng may sakit gaya ng simpleng ubo o sipon na maaaring makahawa sa Pinoy champion.
Pinakiusapan nito ang mga bibisita na ipagbi-gay-alam agad kung mayroon silang karamdaman upang makaiwas agad si Pacquiao.
Mas makabubuti na huwag muna aniyang bumisita kung tukoy nang may sakit ang mga ito.
“Bawal kay Manny ang magkasakit. If you’re not feeling well, say, you have fever, cough cold, please refrain from visiting him at baka mahawaan pa ninyo siya at hindi matuloy ang laban,” ani Fernandez.
Pinayuhan din ni Fernandez na iwasan muna ni Pacquiao ang ilang gawain na walang kinalaman sa boksing gaya ng basketball.
Ito ay para makaiwas sa anumang injury ang eight-division world champion.
At sumusunod naman si Pacquiao na bahagi ng kanyang pagiging disiplinado sa training camp.
“Kailangang mag-ingat. Mabuti naman at sinusunod niya ako sa mga sinasabi ko. Kailangan din na bawasan ang mga bumibisita, iwasan na tumambay ng matagal sa bahay para magkaroon ng sapat na pahinga si Manny,” ani Fernandez.
Nasa kasagsagan ng ensayo si Pacquiao kasama ang buong coaching staff sa pangunguna nina Fernandez, Hall of Famer Freddie Roach at strength and conditioning expert Justin Fortune.
Muling tumakbo ng 5.6 milya si Pacquiao sa Griffith Park kasama ang kanilang mga running mates at trainers.
Pinaghahandaan ni Pacquiao ang unification bout laban kay undefeated American boxer Keith Thurman sa Hulyo 20 (Hulyo 21 sa Maynila) sa MGM Grand Garden Arena sa Las Vegas, Nevada.