MANILA, Philippines — Nagkasya sa runner-up trophy si dating world champion Carlo Biado matapos yumuko kay Kevin Cheng ng Chinese-Taipei, 11-12, sa finals ng 2019 World Pool-Billiard Association (WPA) Players Championship na ginanap sa Griffs Billiards sa Las Vegas, Nevada.
Pagkakataon na sana ni Biado na makuha ang korona nang magtala ito ng 8-5 kalamangan.
Subalit nagmintis ang Pinoy cue master sa No. 4 ball, bagay na sinamantala ng Taiwanese para makabalik sa porma at mahablot ang panalo.
Naibulsa ni Cheng ang tumataginting na $10,000 papremyo habang hindi naman uuwing luhaan si Biado na nagkamit ng $7,000 konsolasyon.
Nakapasok sa finals si Biado nang magtala ito ng 9-6 panalo kay Chang Yu-ung ng Chinese-Taipei sa semis.
Naharang naman ni Cheng ang tangkang all-Filipino finale matapos nitong igupo si Pinoy cue artist Johan Chua, 9-6, sa hiwalay na semis match.
Kabilang sa mga pinataob ni Biado sina Ruben Bautista Escaler sa first round (7-3), Skyler Woodward sa second round (7-5), Yang Ching-Shun ng Chinese-Taipei sa third round (7-6) at Shane Van Boening sa quarterfinals (7-4).
Nagtapos sa ikatlo si Chua para sa $5,000 konsolasyon habang magkasosyo sa ikasiyam sina Raymund Faraon at James Aranas na kapwa nagkamit ng $1,500 matapos makaabot sa third round.