MANILA, Philippines — Kung nanalo ng dalawang beses ang Magnolia ay kaya rin itong gawin ng nagdedepensang Barangay Ginebra sa kanilang semifinals showdown.
“They beat us twice, we feel we can beat them twice,” sabi ni two-time PBA Grand Slam champion coach Tim Cone matapos ang 107-103 panalo ng Gin Kings laban sa Hotshots sa Game Three noong Miyerkules para idikit sa 1-2 ang kanilang best-of-five semifinals series sa 2018 PBA Governor’s Cup.
Determinado ang Ginebra na makatabla sa Magnolia sa Game Four ngayong alas-7 ng gabi sa Ynares Center sa Antipolo City.
Nauna nang yumukod ang Gin Kings, ang back-to-back champions ng season-ending conference, sa Hotshots sa Games One, 98-106, at Two, 97-101 bago naagaw ang Game Three.
“We are here to win the series. I just hope the guys understand that and don’t rest on our laurels that they were able to pull out one game,” sabi ng 60-anyos na si Cone. “We have to keep moving forward.”
Kumolekta si import Justin Brownlee ng 46 points at 19 rebounds para pamunuan ang pagbangon ng Ginebra mula sa 18-point deficit sa Magnolia sa second period at ilista ang 11-point lead sa fourth quarter.
Sina Scottie Thompson at LA Tenorio ang nagbida sa dulo ng final canto para muling ilayo ang Gin Kings matapos makatabla ang Hotshots sa 103-103 sa likod nina Jio Jalalon, Paul Lee at import Romeo Travis.
“I’ve said before na we need to go through the eye of the needle para manalo against Ginebra, and totoo pa rin iyon,” sabi ni Magnolia coach Chito Victolero, napatalsik sa huling 5:08 minuto ng fourth period matapos ibato ang bola sa isang referee. “Iyon ang pinag-uusapan talaga namin before the series na this is not going to be an easy series.”