MANILA, Philippines — Kinumpleto nina Jan Paul Morales at Jermyn Prado ang kanilang double-gold medal performance matapos pamunuan ang criterium races ng Philippine National Cycling Championships for Road kahapon sa McKinley West sa Taguig City.
Bumandera sa men at women elite road races (massed start) sa Subic, Olongapo City at Bataan noong nakaraang linggo, ipinarada nina Morales at Prado ang kanilang Standard Insurance-Philippine Navy uniform sa PhilCycling race na naging tampok sa PRUride PH 2018 ng PRU Life UK.
Namuno si Morales, isang veteran internationalist na kumuha ng bronze medal noong 2008 Asian Championship, sa naturang one-hour-plus-three-laps criterium na 1.10-km circuit.
Mag-isa niyang tinawid ang finish line para iwanan ng 1.386 segundo si national team mainstay George Oconer ng Go for Gold at 1.528 segundo si Dominic Perez ng 7-Eleven Roadbike Philippines.
Tinalo naman ni Prado si Singapore 28th SEA Games individual time trial gold medalist Marella Salamat sa sprint finish.
Hinirang si Aidan Mendoza bilang men under-23 king matapos iwanan sina Ronilla Quita at Tomas Mojares sa labanan para sa top three places.
Tumapos naman sina Jeremy Gene Marana at Irish Wong bilang first at second placers, ayon sa pagkakasunod, sa women’s under-23 category.
Sina Pru Life UK Senior Vice President at Chief Marketing Officer Allan Tumbaga at Prudential PLC Head of Sponsorship Diane Pender ang nagsabit ng medalya sa mga nanalo sa simpleng seremonya sa McKinley West.