MANILA, Philippines — Naghari si Johann Chua sa 2017 All Japan 10-Ball Championship nang kanyang igupo ang kababayang si Jundel Mazon, 12-2 sa finals na ginanap sa Hyogo, Japan.
Nauna nanalo si Chua sa torneong ito noong 2015 at ito ang unang major title ng 22-gulang na si Chua sa taong ito matapos ang kaniyang runner-up trophy sa 2017 Super Billiards Expo Players Championship at tatlong third place finishes sa World Pool Series-High Rock Challenge, World Pool Series-Molinari Players Championship at Inaugural Scotty Townsend 10-Ball Championship.
Nakatanso rin si Chua sa 2017 Southeast Asian Games sa Kuala Lumpur, Malaysia.
Nakapasok sa finals si Chua nang gapiin nito sina Hsieh Chia-Chen ng Chinese-Taipei sa first round (11-8), Kasper Kristoffersen ng Germany sa second round (11-1), Asano Masato ng Japan sa Round-of-16 (11-4), Jeffrey Ignacio ng Pilipinas sa quarterfinals (11-10) at Asian Indoor Games gold medalist Liu Hai Tao ng China sa semifinals (11-2).
Sa kabilang banda, nakapasok sa championship round si Mazon makaraang patalsikin sina Katsuji Teruya ng Japan sa first round (11-10), Ko Seng Ann ng South Korea sa second round (11-5), at sina Taiwanese players Ko Ping-Chung sa Last 16 (11-6), Cheng Yu-Hsuan sa quarterfinals (11-10) at Chang Yu-Long sa semifinals (11-8).
Sunod na lalahok ang Pinoy squad sa 2017 Annual Joy Cup Masters Chinese 8-Ball qualifying tournament na gaganapin sa parehong venue.