MANILA, Philippines – Lalapit pa ang Emilio Aguinaldo College Generals at Ateneo Eagles sa hangaring puwesto sa susunod na round sa pagpapatuloy ng Spikers’ Turf Collegiate Conference eliminations sa The Arena sa San Juan City ngayong hapon.
Kalaro ng NCAA champion na Generals ang Mapua Cardinals sa ganap na alauna ng hapon habang ang UAAP titlist na Eagles ay mapapalaban sa UP Maroons dakong alas-5 ng hapon.
Ang FEU Tamaraws at UE Warriors ay mag-uunahan naman sa kanilang unang panalo sa Group A dakong alas-3 ng hapon.
May 2-0 panalo-talo ang Generals upang makasalo ang National University Bulldogs at NCBA Wildcats sa pangunguna sa Group A.
Pero inaasahang makakakalas sila sa pakikipagsosyo sa liderato lalo pa’t natalo ang Cardinals sa kanilang unang dalawang laro.
Balikatan ang magaganap sa Eagles at Maroons na parehong nagwagi sa kanilang mga unang asignatura.
Ang Eagles ay sasandal sa galing nina reigning MVP Marck Espejo at Ysmael Marasigan ngunit sina Alfred Gerard Valbuena at Julius Evan Raymundo ang mga panapat ng UP. (AT)