MANILA, Philippines — Gagampanan ni Vina Morales ang papel ng isang butihing maybahay na titiising makasama sa iisang bubong ang kabit ng kanyang asawa, na gagampanan naman ni Louise Delos Reyes, ngayong Sabado (Nov. 25) sa MMK.
Masayang namumuhay ang pamilya ni Cenia (Vina) kasama ang asawa nitong si Dodong (Allen Dizon) at pito nilang mga anak. Unti-unting guguluhin ng bulung-bulungan na nambabae si Dodong ang kanilang pamilya hanggang sa mismong panganay pa nila na si Waway (Andrea Brillantes) ang nakakumpirma nito.
Galit at poot ang naramdaman nina Cenia at Waway ngunit hindi pa diyan nagtatapos ang lahat dahil bukod sa nabuntis ni Dodong ang mas batang si Ani (Louise), ay hinabilin pa ni Dodong na alagaan hindi lamang ang kanyang kabit kundi pati ang bunga ng kataksilan nila ni Ani. Sa pagtupad ng kahilingan ng asawa, tumira sina Ani at anak nito sa bahay ni Cenia.
Hanggang saan kakayanin ni Cenia ang kanilang kalagayan? Magkasundo kaya sila ni Ani?
Makakasama rin sa upcoming episode sina Tony Manalo, at Hyubs Azarcon.
Ang episode ay sa ilalim ng direksyon ni Topel Lee at panulat ni Benson Logronio.