2 drug suspect timbog sa P6.8 milyong shabu

MANILA, Philippines — Dalawang drug suspect ang naaresto sa isinagawang buy-bust operation ng mga tauhan ng Philippine Drug Enforcement Agency (PDEA) at nasamsam ang may isang kilo ng hinihinalang shabu sa Pasay City kamakalawa.

Kinilala ang mga naarestong sina Jake Hernandez, 21; at Lorieben Delos Santos, 18, kapwa residente ng naturang lungsod.

Sa inisyal na ulat ng PDEA, alas-8:55 ng umaga nang maaresto ang mga suspek sa ikinasang buy-bust operation sa Barangay 76, sa isang mall sa Pasay City.

Nabatid na unang nakatanggap ng tip ang mga otoridad hinggil sa ilegal na aktibidad ng mga suspek dahilan upang isagawa ang buy-bust operation.

Nakumpiska mula sa mga suspek ang isang kilo ng hinihinalang shabu na nakalagay sa malaking heat sealed transparent plastic sachet at tinatayang nagkakahalaga ng P6.8 milyon.