Senado, Kamara humiling sa Comelec na palawigin ang voter’s registration
MANILA, Philippines — Nagsanib-pwersa ang 23 senador maliban kay Senator Aquilino “Koko” Pimentel III sa pagpapalawig ng voter’s registration period para sa 2022 national at local elections hanggang Oktubre 31, 2021 nang suportahan nila ang Senate Bill 2408.
Giit ng mga mambabatas, ang Setyembre 30, 2021 deadline ay itinakda ng Commission on Elections(Comelec) noon pang bago ang pandemya.
Anila sa mga nakalipas na pagpapatupad ng quarantine restriction, nasa 28.3% ng kabuuang registration period ang sinuspinde.
“Comelec has the prerogative to set the deadline of voter registration on a later date but before January 9, 2022, taking into consideration this public health emergency, in order to prevent voter disenfranchisement,” dagdag pa sa panukala.
Nitong Lunes ay nagbabala si Senate Minority Leader Franklin Drilon na tapyasan ang pondo ng Comelec sa “barest minimum” kapag hindi sila tumugon sa panawagang palawigin pa ang voter’s registration.
Hindi naman nagpasindak ang Comelec at sinabi na malaya ang Senado na gawin ang kanilang dapat gawin.
Maging ang mga lider ng Mababang Kapulungan ng Kongreso ay nagkaisa sa pag-apela sa Comelec na palawigin pa ang voter’s registration sa Setyembre 30, 2021 ng isa pang buwan kasunod ng inihaing House Resolution (HR) 10261). - Joy Cantos
- Latest
