DA mihatag og ekipos alang sa composting sa Siyudad sa Sugbo

CEBU, Philippines — Walo ka unit sa Composting Facility for Biodegradable Waste(CFBW) ang naangkon sa Kagamhanan sa Dakbayan sa Sugbo nga gihatag gikan sa Department of Agriculture–Bureau of Soils and Water Management (DA-BSWM) ubos sa National Rice Program.

Ang mga composting shredder gamiton aron nga maproseso ang biodegradable waste ngadto sa organikong compost nga magamit sa pagtanom sa humay, mais, ug mga high-value crops sama sa prutas ug utanon ug uban pang lagutmon.

Gilauman usab kini nga makatabang sa pagpatuman sa Republic Act No. 9003 o Ecological Solid Waste Management Act ug sa Organic Agriculture Act nga nagdasig sa paggamit sa organikong abono aron mapauswag ang kalidad sa yuta ug mamenosan ang pagsalig sa kemikal nga abono.

Gipahigayon ang turnover ceremony sa Cebu City Eco-Station niadtong Hunyo 18, nga gitambungan nila ni Mayor Nestor Archival, DA-BSWM Director Gina P. Nilo, Ph.D.; DA-RFO-7 Regional Executive Director Angel C. Enriquez; Leolito D. Siase kinsa representante sa BSWM; Engr. Cirilo N. Namoc sa DA-RFO-7; ug labaw sa Cebu City Agriculture Office nga si Joelito “Joey” L. Baclayon.

Sa taho sa Cebu City News, ang naangkon nga pasilidad resulta kini sa tripartite Memorandum of Agreement (MOA) nga gipirmahan sa DA-BSWM, Department of Agriculture Regional Field Office-7 ug sa kagamhanan alang sa pagtukod, operasyon, ug pagmintinar sa composting facilities sa siyudad.

Ubos sa MOA, obligado ang kagamhanan pinaagi sa CAD nga magbutang og labing menos duha ka hanas nga kawani aron mopadagan ug magmintinar sa mga pasilidad, magtipig og production records, ug magsumite og quarterly reports ngadto sa DA-RFO-7.

Ang DA-BSWM ug DA-RFO-7 maoy mohatag og teknikal nga suporta ug magpatuman og regular nga monitoring sa operasyon sa composting facility sa Eco-Station.

Sumala sa lokal nga kagamhanan, ang maong panagtambayayong nagpalig-on sa programa sa siyudad alang sa malungtarong pagdumala sa basura ug pagpalambo sa organikong agrikultura. — /MEL (BANAT NEWS)