Naabtikan ni Ligutan
Naabtan og duha ka adlaw ang ilang paningkamot pagbuslot sa testimoniya sa unang saksi sa prosekusyon sa impeachment trial, pero giangkon ra gihapon sa depensa nga nanghulga si Bise Presidente Sara Duterte pagpapatay nilang Presidente Ferdinand Marcos Jr., First Lady Liza Marcos, ug kanhi House speaker Martin Romualdez.
Pero gipagamay nilang krimen: Igo lang nanalipod si VP Sara sa iyang pamilya nga gihulga nga hutdon sa pagpatay pinaagi sa Operation Romanov; ug kon duna may kasong mapasaka adto ra tugpa sa kinaubsan nga korte, dili maisip nga impeachable offense.
-o0o-
Lisod nang daan ang pagpanalipod ni VP Sara atubangan sa lig-on nga mga ebidensiya batok niya, gidugangan pa g’yud sa depensa ang ilang trabaho. Kinahanglan nilang pamatud-an ang Operation Romanov.
Nga gisuwayan na og susi sa National Bureau of Investigation (NBI). Pinaagi sa pagpangayo og dugang kasayuran gikan nilang VP Sara ug Princess Maui, kadtong vlogger nga gipaapil sa iyang Zoom presscon niadtong tungang gabii sa Nobyembre 23, 2024 nga nagsige og balikbalik sa pagpadayag og kabalaka sa seguridad ni VP Sara ug sa tibuok pamilya tungod sa Operation Romanov.
-o0o-
Pero wala motabang sa imbestigasyon silang VP Sara ug Princess Maui. Wala say nakuha nga kasayuran ang NBI gikan sa Philippine National Police, Armed Forces of the Philippines, ug Presidential Security Group.
Nga maoy gigikanan sa mga sakop sa Vice Presidential Security and Protection Group. Nga mao untay labing unang nahibawo sa bisan unsang hulga batok ni VP Sara ug sa iyang pamilya ug ni-report unta dayon sa ilang mother units.
-o0o-
Gawas sa posibilidad nga mugna ra sa hunahuna ang Operation Romanov, dili makapangugat ang depensa nga walay ebidensiya ang prosekusyon nga tinuod ang sulti ni VP Sara nga duna na siyay gikontrata nga hitman.
Na-unhan na silang Private Prosecutor Amando Virgil Ligutan: Ang napakita nga videos sa press conferences ni VP Sara nagpakita og peligruso nga mga taras nga maisip nga pagbudhi sa pagsalig sa publiko tungod sa ilang ka-iresponsable, kamapangahason, ug pagsukwahi sa kaligdong sa iyang opisina. Nahibawo si Ligutan nga kinahanglan nilang pamatud-an sa Senate impeachment court nga si VP Sara dili angay nga magpabilin sa iyang puwesto.
- Latest
