Alas Women matindi ang training

MANILA, Philippines — Matinding preparasyon na ang ginagawa ng Alas Pilipinas Women’s volleyball pool para paghandaan ang 20th Asian Games sa Aichi-Nagoya, Japan sa Setyembre.

Sumalang sa tatlong ensayo ang 17 sa 22 miyembro ng training pool sa pangunguna nina Bella Belen, Vanie Gandler at Erika Santos ng Capital1, Alyssa Solomon ng Strong Group Athletics, Eya Laure at Dawin Catindig ng Choco Mucho at Jia De Guzman at Jen Nierva ng Creamline.

Nakasama nila sina Del Palomata (PLDT), Thea Gagate (ZUS Coffee), Mars Alba at Justine Jazareno (Akari), Nina Ytang (SGA) at National University standouts Arah Panique, Shaira Jardio, Celine Marsh at Vange Alinsug.

Si Shaira Nitura ng Adamson University ay nagre­rekober pa sa kanyang surgery.

Nagsasanay ang Alas Women pool sa Gameville sa Mandaluyong City at sa MPire Center sa Quezon City bago lumipat sa Philippine Sports Commission (PSC) facility PhilSports Arena sa Pasig City.

Inaasahang sasama sa training sina Fifi Sharma (Akari), Gel Cayuna (Nxled), De La Salle stars Angel Canino at Amie Provido (De La Salle) at Alleiah Jan Malaluan (PLDT) na nagpapagaling ng knee injury.

Ang pagsasanay ng Alas Women ni Japanese Takayuki Minowa ay nasa ilalim ng Philippine Olympic Committee (POC) matapos suspindihin ng FIVB ang Philippine National Volleyball Federation (PNVF).

Nakatakda ang 2026 Asian Games sa Setyembre 19 hanggang Oktubre 4.

Bago sumabak sa Asiad ay hahataw muna ang Alas Women sa Sixth Southeast Asia (SEA) V Cup Week 1 sa Hulyo 31 hanggang Agosto 2 sa Ninh Binh, Vietnam at sa Week 2 sa Chiang Mai, Thailand sa Agosto 7 hanggang 9. Lalahok naman ang Alas Pilipinas Men sa SEA V Cup sa Hulyo 15-19 sa Candon City Ilocos Sur.