Buslot sa depensa
Nasihag ang depensa ni Bise Presidente Sara Duterte sa pasangil nga duna siyay ilegal nga katigayonan nga wala itug-an sa iyang Statements of Assets, Liabilities and Net worth (SALNs) tungod sa iyang paglista ni kanhi senador Antonio Trillanes nga usa sa mga saksi nga ipatawag sa iyang impeachment trial nga sugdan sunod buwan.
Gamiton niya ang fruit of the poisonous tree doctrine: Pinaagi sa pagkumbinser sa senator-judges nga ilegal nga nakuha ni Trillanes ang kopya sa pribado niyang bank documents ug busa dili mahimong gamiton nga ebidensiya batok niya.
-o0o-
Mao tingali nga imbes molikay nihukom siya pagtuman sa mga sugo sa Senado, pagsumiter niadtong Lunes sa listahan sa iyang mga saksi ug mga ebidensiya ug pagtambong sa pre-trial conference karong adlawa, Huwebes, ug pagsugod sa husay unya sa Hulyo 6.
Gipasaligan tingali sa 16 niya ka mga abogado ug abogada nga dili matinuod ang iyang labing dakong kahadlok nga maablihan ang bank accounts nga giingon ni Trillanes nga dunay binilyon ka pesos. Kay mapamatud-an nila nga walay kapuslanan ang pagsupina sa mga dokumento nga dili magamit batok niya.
-o0o-
Daotang balita para ni VP Sara: Wala magsalig ang House panel of prosecutors sa mga dokumento ni Trillanes, maong dili nila ipatawag si Trillanes; duna silay lain ug mas kasaligan ug dili malalis nga legal nga mga tinubdan sa kasayuran.
Dili makuwestiyon ni VP Sara kon ang iyang gisaligan nga mga bangko maoy supinahan sa impeachment court ug moabli sa accounts niya uban sa iyang bana nga si Manases Carpio ug amahan nga si kanhi presidente Rodrigo Duterte.
-o0o-
Salamat sa talagsaong katakos ni Trillanes sa pagpangimbestigar, nakahipos siya og bank documents sa mga Duterte nga gipamatud-an sa Anti-Money Laundering Council. Bisan walay gahom pagkuha sa mga dokumento, nakagiya siya sa mga kongresista pagkuha og dugang mga ebidensiya ginamit ang subpoena powers sa impeachment court.
Bisan unsaon pagkulata si Trillanes sa defense team ni VP Sara atol sa husay, mabantang sa katawhan ang sekreto sa mga Duterte. Nga giwara-wara ni Trillanes sukad sa 2016. Pero tungod sa ilang kahawod wala matarung sa pag-imbestigar. Hinaot nga matapos nang ilang kakublan sa balaod sa impeachment trial.
- Latest
