Sixers mipalagpot sa Celtics
CEBU, Philippines — Si Joel Embiid miharos og 34 puntos ug 12 ka rebounds sa dihang gipakaging sa Philadelphia 76ers ang Boston Celtics, 109-100, sa tinagakay nga Game 7 aron pag-angkon og luna sa NBA Eastern Conference semifinals kagahapong adlawa didto sa TD Garden sa Boston, Massachusetts.
Nanghugyaw sab si Tyrese Maxey, nga mibubo og 10 sa iyang 30 puntos sa katapusang kuwarter alang sa Sixers nga madasigong mibangon human maalkansi og 3-1 sa serye aron pabakasyonon ang Celtics.
Ang Sixers makigsangka sunod batok sa New York Knicks sa East semis.
Si Jaylen Brown mikadlit og 34 puntos uban ang siyam ka rebounds aron pangulohan ang Celtics samtang si Derrick White midonar og 26 puntos.
Apan ang Celtics mipasud lamang og 13 sa 49 nila ka 3-pointers ug sa kanunay naggukod human ang Sixers miposte og 15 puntos nga labaw sa unang kuwarter.
Ang Celtics nakasikit ngadto sa usa na lang ka lugas pipila ka higayon sa katapusang kuwarter apan si
Maxey mibirada og walo ka sagunson nga puntos aron paginhawaon og lawom ang Sixers, 107-98, sa hilimatyong segundos.
Ang Celtics miduwa nga wala si Jayson Tatum kay dunay angol sa wala niining tuhod.
- Latest
