"Karambola" MMA card sa Mactan karong gabii

CEBU, Philippines — Kulbahinam ug huego todo nga mga kumbati ang angayan atngan sa mga fans sa "Karambola" mixed martial arts card karong adlawa didto sa Barangay Mactan gym sa dakbayan sa Lapu-Lapu.

Sugdan ang pinaksitay ibabaw sa ring sa alas-7 sa gabii. Sa main event diin magbangga ang duha ka mga disipulo sa Brazilian Jiu-Jitsu, si Mcdom  "Wolverine" Malawi sa Malawian Jiu-Jitsu mosakbang ni Tonix "Silent Warrior" Borres sa JB Dream Gym.

Magbugno sab sa BJJ sila si Raffy Malawi vs Joed Bolutano of MCS-MMA;Christian "Sniper" Tan vs Norman "Jaguar" Enriquez;Aljun "Merekat" Majo Jr. vs Reymart "The Specter" Tauy;ug Zachary "Badger" Tan vs Andrei "Fireborn" Enriquez.

Angayan sab nga lantawon ang engkuwentro tali sa duha ka mga babaye diin mag-abot sila si Emmilou "Honey" Catipay ug Abegail "Firefly" Malawi.

Sa main event sa MMA, si Taiga Oril sa JB Dream Gym makigharong ni Al-Shardiz "Yoyoy" Damlani sa Two Edge MMA.

Sa co-main event, si Lourence "O-dong" Pendejito sa JB Dream Fitness Gym makigsangka ni Angelo "Anghel" Anciano sa P3B MMA Gym.

Sa laing bahin, si Geno "Bad Boy" Padilla sa Malawian MMA makigtige ni Kim "Super Jet" Bimbal sa Lapu-Lapu Striker, samtang si Keith Sumalinog sa MCS-MMA mohamag ni Mark "The Destroyer" Sungahid sa Hyper Eagle MMA.

Sa espesyal nga atraksiyon, si Eric Igot-Caballero, konsehal sa Barangay Mactan nga usa sa mga organizers, mopakita sa iyang abilidad sa MMA batok ni Joshua Colonia.

Sa laing bahin, si Richard "The Monster" Sungahid sa Hyper Eagle MMA makigpinatiray dala ang sukmag uban ni Leevan "Jason" Lausa sa Two Edge MMA sa bugtong kickboxing nga sangka.

Ang mga tickets nagkantidad og P50 sa general admission, P100 sa ringside, ug P150 sa VIP.