CEBU, Philippines — Nakapanalipod sa ilang kaugalingong balwarte ang LBA 3Kings human ilang gipaluhod ang nanulong nga Uratex Mandaue, 104-95 sa ilang friendly match niadtong Biyernes diha sa Lamac gym sa Consolacion, Cebu.
Si Jonnas Cayanong ang nangu sa balanseng opensa sa LBA nga mikabkab og 20 puntos, gisundan ni Cyril Agan nga dunay 12 puntos.
Ang LBA 3Kings nga gipaluyohan nilang Neil Maglasang, Barangay Lamac councilors Roy Ermac ug Martin Colubio nabiyaan sa sayong bahin sa first quarter, 0-8. Hinuon, nakabawi kini human milusad og 14-0 run aron moposte'g 21 puntos sa third period.
Mihimo og laing mainitong rally ang Uratex ug nakibhangan ang dakung labaw sa LBA 3Kings ngadto sa single digit pagsugod sa fourth quarter nga maoy labing nindot nilang nahimo. Kay bisan giunsa nila'g gukod wala mosalir ang ilang mga paningkamot gumikan kay nahutdan kini sa oras. Upat unta ka Uratex players ang miiskor og double figures, apan nakawang lang kay napilde ang ilang koponan.