Lyceum sinilat ang Enderun

MANILA, Philippines — Nalusutan ng Lyceum of the Philippines University ang Enderun Colleges, 22-25, 25-20, 25-19, 24-26, 16-14, upang putulin ang losing skid nito sa V-League Women’s Collegiate Challenge na ginaganap sa Paco Arena sa Manila.

Nagrehistro si middle blocker Janeth Tulang ng 22 puntos mula sa 18 attacks at apat na blocks upang pamunuan ang ratsada ng Lady Pirates.

Solido rin ang kontribusyon ni Johna Dolorito na naglista ng 20 puntos, 15 excellent digs at siyam na receptions para tulungan ang kanilang tropa na makuha ang panalo.

Nagdagdag pa si Joan Doguna ng 17 markers para sa Muralla-based squad.

“Sabi ko sa kanila i-maximize namin yung strength namin, yung advantage namin sa kalaban and minimize lang yung errors kasi sobrang dami talaga,” ani Lyceum head coach Cromwel Garcia.

Bumandera para sa Enderun si Erika Deloria na may 22 puntos habang naglista naman si Althea Botor ng 21 markers.

Bagsak sa 1-4 ang Enderun.