Obiena sumegunda sa International Jump meet
MANILA, Philippines — Magarbong sinimulan ni World Championship bronze medalist EJ Obiena ang kanyang 2023 indoor season matapos masungkit ang pilak na medalya sa Internationales Springer-Meeting na ginanap sa Cottbus, Germany.
Inirehistro ni Obiena ang 5.77 metro para masiguro ang ikalawang puwesto.
Nanguna sa naturang event si Sam Kendricks ng Amerika na nagtala ng dikit na 5.82 metro.
Sa kanyang unang lundag ay nakuha ni Obiena ang 5.50 metro sa ikatlong pagtatangka.
Kaagad naman niyang nalinis ang 5.67m at 5.77m.
Sinubukan ni Obiena na makuha ang 5.82m subalit bigo siya sa kanyang tatlong attempts dahilan para magkasya lamang sa pilak na medalya.
Si Ben Broeders ng Belgium ang kumuha ng bronze via countback kay hometown bet Gillian Ladwig matapos silang magtala ng parehong 5.72m.
Magandang simula ito para kay Obiena na ilang malalaking torneo ang paghahandaan sa taong ito.
Kabilang na rito ang pagdedepensa sa kanyang korona sa Southeast Asian Games sa Cambodia sa Mayo kung saan target niyang magtala ng bagong SEA Games record.
Puntirya rin ni Obiena na masikwat ang ginto at Asian record sa 19th Asian Games na gaganapin naman sa Hangzhou, China sa Setyembre.
- Latest
