Titans, Prayboys padayong nanginit
CEBU, Philippines — Ang Titans ug ang Prayboys nagpabiling way pilde sa 30-above division sa Amicis Basketball League (ABL) Season 2 didto sa Consolacion gym. Si Jacob Budz mipabuto og 30 points samtang si Larry Malagar midugang og 19 puntos alang sa Titans nga mipayaka sa Legendary, 79-76, aron inaton ang perpekto nilang record ngadto sa 4-0. Sama sa Titans, ang Prayboys wa pa gihapo'y tatsa uban ang 3-0 nga baraha human nakasagunson og duha ka sikit kaayong daog batok sa Legendary, 88-85, ug Amigos, 86-84.
Sa laing bahin, ang Artera mibira sab og duha ka sunod-sunod nga daog batok sa Amigos, 95-92, ug 032 Kicks by Miller, 94-75.
Mihimo sab og kasikas sila si Teodoro Tundag, Ronnie Caban ug Niel Quiapo nga nagkumboya'g 60 puntos sa dihang way kaluoy nga gikulata sa Persecutors ang Top Gun, 114-56.
Dili na malalis pa ang resulta sa dihang ang Persecutors mi-establisar og 80-49 nga labaw human sa tulo ka kuwarter. Wala pa makuntento, ilang gilimitahan ang Top Gun ngadto lamang sa siyete puntos samtang sila mikadlit aron silyohan ang makalisang nilang 58 puntos nga masaker.
Sa ubang mga duwa, ang Miners mipakurat sa kanhi way pildeng Alfa Wanbatz, 88-81, alang sa ikatulo nilang daog sud sa lima ka duwa samtang ang YYBC mipaksit sa Gemini, 112-93, aron pakgangon ang tulo ka duwa nilang malas. Sila si Razel Mansera, Chito Angtud ug Benigno Tiongzon nagkumbinar og 66 puntos alang sa Miners samtang sila Kobe Ponce ug Gicole Iyong nagkatigum og 61 puntos alang sa YYBC.
- Latest
