Lady Eagles nakatikim na ng panalo
MANILA, Philippines — Nadagit din ng defending champions Ateneo Blue Eagles ang unang panalo matapos silang akayin ni Faith Nisperos kontra sa Far Eastern University Lady Tamaraws, 25-16, 25-14, 25-14, sa UAAP Season 84 women’s volleyball tournament na nilaro sa SM Mall of Asia Arena sa Pasay City, kahapon.
Tumikada si Nisperos ng 14 points mula sa 11 spikes, dalawang service aces at isang block upang tuldukan ng Ateneo ang three-game losing skid at ilista ang 1-3 karta.
Nakatuwang ni Nisperos sina Jaja Maraguinot at Lyann De Guzman para walisin sa tatlong sets ang Lady Tamaraws na nalasap ang pangatlong talo sa apat na salang.
Ipinaramdam agad ng Blue Eagles ang kanilang lakas sa unang set matapos nilang tukain ang 25-16 panalo.
Nauna rito, kinapitan ng National University Lady Bulldogs ang bangis ni Sheena Toring upang sakmalin ang University of the East Lady Warriors, 25-11, 25-20, 25-13.
Humarabas si Toring ng 13 puntos kasama ang walong blocks para tulungan ang NU na ilista ang ika-4 na sunod na panalo.
- Latest
