Sotto nagbalik sa bansa
MANILA, Philippines — Balik-Pilipinas muna si Kai Sotto bago harapin ang matinding pagsubok na pagdaraanan niya sa mga aktibidad ng NBA Rookie Draft na nakatakda sa Hunyo 23 sa Brooklyn.
Sariwa pa ang 7-foot-3 PInoy cager sa kampanya sa Australia National Basketball League (NBL) kung saan nasibak sa kontensyon ang kanyang tropang Adelaide 36ers.
Kaya naman sinamantala ni Sotto na makabalik sa Pilipinas para makasama ang ilang kamag-anak at malalapit na kaibigan bago tumulak pa-Amerika para sa draft activities.
Nakasama ni Sotto ang kanyang ninong Ranidel De Ocampo at ilang malalapit na kaibigan ng kanyang amang si Ervin.
Nasilayan din si Sotto na nanood ng live sa bakbakan ng Ateneo Blue Eagles at UP Fighting Maroons sa UAAP Season 84 men’s basketball tournament noong Linggo sa Mall of Asia Arena sa Pasay City.
Suportado ni Sotto ang mga dati niyang katropa sa Blue Eagles noong naglalaro pa ito para sa Ateneo sa juniors’ division.
Noong nakaraang linggo ay nagdeklara si Sotto na sasali sa NBA rookie draft sa taong ito kung saan usap-usapan na sa social media na may mga NBA teams na interesadong kunin ang Pinoy cager.
- Latest