Pacquiao ‘di nangalawang!

Roach bilib sa unang araw ng training

MANILA, Philippines — Saludo si trainer Freddie Roach sa matikas na ipinamalas ni eight-division world champion Manny Pacquiao sa opening day ng puspusang pagsasanay nito sa Wild Card Gym sa Hollywood, California.

Bilib si Roach sa ma­gan­dang porma ng pa­ngangatawan ng Pinoy champion na pormadung pormado sa kabila ng ma­habang panahon na pahinga.

Lutang na lutang ang mabagsik na kamao ni Pacquiao sa videong inilabas nito sa social media.

Hindi nakitaan ng pa­ngangalawang si Pacquiao na mabilis pa rin ang footwork at hindi makikitaang nasa edad 42-anyos na.

Dahil dito, mataas na grado ang nakuha ni Pacquiao mula kay Roach.

“He’s really sharp on his frist day,” wika ni Roach na masayang mu­ling nakasama si Pacquiao matapos ang ilang buwang pagkakatengga dahil sa pandemya.

Magsasalpukan sina Pacquiao at reigning World Boxing Council (WBC) at International Boxing Fe­deration (IBF) welterweight champion Errol Spence Jr. sa Agosto 22 (Manila time) sa Las Vegas, Nevada.

Target ni Pacquiao na makuha ang 100 porsiyentong kundisyon dahil alam nitong hindi basta-basta kalaban ang tulad ni Spence.