Paul, Booker binitbit ang suns sa 2-0 lead
Gobert hinirang na defensive player of the year
PHOENIX - Muling pinalubog ng Suns ang Denver Nuggets matapos kunin ang 123-98 panalo sa Game Two para itala ang 2-0 bentahe sa kanilang Western Conference semifinals duel.
Naglista si point guard Chris Paul ng 17 points at 15 assists habang may 18 markers at 10 rebounds si Devin Booker para sa Phoenix, sinibak ang nagdedepensang Los Angeles Lakers sa first round.
Humakot naman si center Deandre Ayton ng 16 points at 10 boards at nagdagdag din si Mikal Bridges ng 16 markers.
Matapos ilista ang 10-point lead sa halftime ay pinalaki pa ito ng Suns sa 60-43 sa third quarter galing sa dalawang three-point shots ni Jae Crowder hanggang tuluyan nang iposte ang 31-point advantage sa fourth period.
Pinamunuan ni NBA MVP Nikola Jokic ang Nuggets sa kanyang 24 points at 13 rebounds .
Samantala, kinilala si Utah Jazz center Rudy Gobert bilang NBA Defensive Player of the Year sa ikatlong sunod na season.
Humugot ang 7-foot-1 na si Gobert, may pinakamaraming naitalang blocked shots at defensive rebounds ngayong season, ng 84 first-place votes at 464 points mula sa global panel na binubuo ng 100 sportswriters at broadcasters.
Inungusan ni Gobert para sa award sina Ben Simmons ng Philadelphia 76ers at Draymond Green ng Golden State Warriors.
- Latest
