ABAP, PSC ‘di nagkulang ng suporta kay Marcial

MANILA, Philippines — Parehong may hinanakit ang Association of Boxing Alliances in the Phi­lippines (ABAP) at Phi­lippine Sports Commission (PSC) kay Olympic Games-bound Eumir Felix Marcial.

Ipinagtataka ni ABAP secretary-general Ed Picson ang reklamo ni Marcial na wala siyang natatanggap na suporta mula kay boxing association president Ricky Vargas at sa PSC.

“Ang problema lang talaga medyo naguguluhan yata siya sa role niya as a professional and as a national athlete,” ani Picson.

Sa panayam ng “Power and Play” program ni Noli Eala noong Sabado ay ibinunyag ni Marcial ang kawalan ng suporta sa kanya ng ABAP at PSC para sa preparasyon niya sa 2021 Olympics sa Tokyo, Japan.

Noong Hulyo ng 2020 ay pumirma si Marcial ng six-year contract sa MP Promotions ni Manny Pacquiao at ginawa ang kanyang pro debut noong Disyembre 17 via unanimous decision win kay American Andrew Whitfield sa Los Angeles, USA.

Imbes na sumama sa training camp sa Thailand kung saan naroon sina Olympic qualifiers Irish Magno, Nesthy Petecio at Carlo Paalam ay umuwi si Marcial sa Zamboanga City.

Bukod sa cash incentives na ibinigay ng ABAP at PSC sa pagkakapasok ni Marcial sa Olympics, nagbigay na rin ang sport agency sa boxing ng pondo para sa paglahok ng 24-anyos sa middleweight fighter sa ASBC Asian Elite Men and Women Boxing Championships sa Mayo 23 hanggang Hunyo 1 sa Dubai.