Pinay rowers sasagwan sa Olympic qualifiers sa Japan
MANILA, Philippines — Sasagwan sina 2019 Southeast Asian Games gold medalists Melcah Jen Caballero at Joanie Delgaco sa Asian and Oceania Continental Qualification Regatta sa Mayo 5-7 sa Tokyo, Japan.
Ang top three rowers ang makakasikwat ng tiket para sa 2021 Olympic Games sa Tokyo na nakatakda sa Hulyo 23 hanggang Agosto 8.
Nakakuha ang 25-anyos na si Caballero ng silya sa medal race ng women’s 500-meter lightweight single sculls sa virtual competition ng World Rowing Indoor Championships matapos manguna sa continental qualifier.
Umabante rin ang 22-anyos na si Delgaco sa open qualification.
Mas pinili ni Caballero, sinagwan ang gold medal sa lightweight single sculls ng 2019 SEA Games, na makipagtambal kay Delgaco sa double sculls.
Hangad nina Caballero at Delgaco na makasama sa 2021 Tokyo Olympics sina pole vaulter Ernest John Obiena, gymnast Carlos Edriel Yulo at boxers Eumir Felix Marcial at Irish Magno.
Ang iba pang naghahangad ng Olympic berth ay sina 2016 Rio de Janeiro silver medalist Hidilyn Diaz (weightlifting), 2018 Asian Games gold medal winner Margielyn Didal, 2019 world champion Nesthy Petecio (boxing) SEA Games queens Kiyomi Watanabe (judo) at Junna Tsukii at Jamie Lim (karatedo).
- Latest
