Registration sa virtual St. Ignatius Run gisugdan na

CEBU, Philippines — Gisugdan na kagahapon ang registration sa  Global Virtual St. Ignatius Run: La Carrera De San Ignacio.

Gipasiugdahan sa Batch 1995 sa Sacred Heart School-Ateneo de Cebu (SHS-AdC) Alumni Association, ang lumba naglatid og lima ka kategoriya nga mao ang 1K, 3K, 6K, 12K ug 21K sa men's ug women's division.

Ang mga runners makabuot kon asa ug kon kanus-a sila modagan basta modagan lamang sila sa mga petsa gikan sa Marso 1 ngadto sa 15. Kausa lamang nila daganon ang distansiya diin sila narehistro ug dili sa tagi-tagi nga paagi.

Ang mga partisipante adunay kahigayonan nga modaog og mga ganti sa raffle draw.

Ang grand prizes mao ang usa ka Kawasaki Motorcycle unit ug duha ka Garmin Fenix 6.

Mga Asahi appliances, Asics nga sapatos, UV light, wireless earphones, restaurant gift certificates, ug uban pang mga gamit ang bolahon sab.

Ang registration nagkantidad og P950 sa tanang kategoriya, apil na niini ang sublimated nga St. Ignatius Run 2020 T-shirt, Trucker Cap, shoe bag ug face mask. Ang registration hangtod lamang sa Pebrero 28. Alang sa dugang mga pakisayod, mahimong mobisita sa St. Ignatius Run Facebook page sa https://www.facebook.com/stignatiusrun2021.