Celtics umeskapo sa Warriors
SAN FRANCISCO — Kumamada si Jayson Tatum ng 27 points para tulungan ang Boston Celtics na talunin si Stephen Curry at ang Golden State Warriors, 111-107.
Nagdagdag si Jaylen Brown ng 18 points at 10 rebounds para sa pagpigil ng Celtics (11-8) sa kanilang two-game losing skid.
Naghulog si Curry ng 38 points tampok ang pitong three-pointers para sa Warriors (11-10) at nakasama ang namayapang si Hall of Famer Wilt Chamberlain bilang tanging Warriors player na umiskor ng 17,000 points para sa franchise.
Sa New York, nagpasabog si Kyrie Irving ng season-high 39 points para pamunuan ang Brooklyn Nets (14-9) sa 124-120 pagdaig sa Los Angeles Clippers (16-6).
Nagdagdag si Kevin Durant ng 28 points at tumipa si James Harden ng triple-double sa kanyang 23 points, 14 assists at 11 rebounds para sa Nets.
Nagwakas naman ang three-game winning streak ng Clippers, nakahugot kay Kawhi Leonard ng 33 points at 26 markers kay Paul George.
Sa Orlando, humataw si Fred VanVleet ng franchise record na 54 points na tinampukan ng career-best 11 triples para sa 123-108 panalo ng Toronto Raptors (9-12) sa Magic (8-14).
Sa Washington, tumipa si Damian Lillard ng 32 points para sa 132-121 tagumpay ng Portland Trail Blazers (11-9) kontra sa Wizards (4-13).
Sa Indianapolis, naglista si Domantas Sabonis ng season-high 32 points at 13 rebounds para sa 134-116 pananaig ng Indiana Pacers (12-9) sa Memphis Grizzlies (9-7).
- Latest
