San-En NeoPhoenix midaog na gyud sa 2019-20 B League

CEBU, Philippines — Giputol sa San-En NeoPhoenix ang nagkadinang walo ka pilde sa 2019-20 B. League season  pinaagi sa paglubong sa Levanga Hokkaido, 83-69 niadtong Sabado didto sa Hokkaido Prefectual Sports Center sa Japan. Ang daog magsilbe sab nga sinugatan sa pagbalik ni Thirdy Ravena, kansang duwa gilimitahan.

Sa limitado niyang oras, si Ravena mikulit og singko puntos, tulo ka rebounds ug tulo sab ka assists sa 18 minutos niyang pagduwa.

Nahimong bida sa labing unang daog sa San-En  mao ang import nilang si Kyle Hunt ug Stevan Jelovac pinaagi sa ilang double-double performance.   

Si Hunt mipabuto og 22 puntos uban ang 11 ka rebounds, samtang si Jelovac miamot o 21 puntos ug 10 ka rebounds alang sa San-En nga napilde sab sa katapusan nilang upat ka duwa nga wala si Ravena.

Alkanse og usa ka lugas, 20-19, ang San-En milusad og makabungog nga 20-5 luyo sa kainit ni Jelovac, kinsa mihipos og 19 puntos sa first half ug gipangulohan ang mainitong rally pinaagi sa tres nga naghatag sa NeoPhoenix og 39-25 nga bentaha sa nahibiling dos minutos.

Sukad niadto salida na tanan sa San-En  nga padayon mipadahunog sa ilang opensa aron ilubong ang Levanga og 30 puntos, 73-43 sa tunga-tungang bahin sa fourth quarter.

Sila si Takanobu Nishikawa ug Tatsuya Suzuki mitampo’g 11  ug  nuybe puntos sa San-En nga adunay 50 percent field shooting batok sa 36.4 percent sa Levanga.

Si Jawad Williams miposa og 15 puntos ug milangkat og walo ka rebounds, samtang si Asahi Tajima adunay 14 points ug pito ka assists sa napildeng  Hokkaido nga miduwa nga wala ang ilang scoring leader nga si Nick Mayo.