David vs Goliath: Lantaw ni Jones sa away nilang Tyson
CEBU, Philippines — Gihulagway ni kanhi four-division world champion Roy Jones Jr. ang umaabot nilang sangka ni Mike Tyson sama sa pamosong away sa Bibliya tali ni David ug Goliath.
Si Jones, 51-anyos, gikatakda nga makigharong sa 54-anyos nga si Tyson sa comeback fight niini karong Septiyembre 12 didto sa Dignity Health Sports Park sa Carson, California.
Matud pa ni Jones nga ang iyang kaugalingon susama ni David nga makigbatok sa higanteng Goliath sa pagkatawo ni Tyson ug dili siya angayan nga mabalaka gumikan kay anaa man ang Ginoo sa iyang kiliran.
"It’s like David and Goliath. He’s a giant monster, we know," matud pa ni Jones, ang bugtong boksidor sa kasaysayan nga nag-pro isip junior middleweight ug nahimong world heavyweight champion.
"I’m little David and all I’ve got is God on my side, which is all I’m gonna need," dugang pa ni Jones.
Biya man tuod siya apan si Jones dunay bentaha batok ni Tyson. Samtang si Tyson wala na makaaway sukad miretiro niadtong 2005, si Jones kanunay mipakita'g aksiyon bisan padung sa edad nga 50.
Sa miagi niyang away, gibuntog ni Jones si Scott Sigmon aron sakmiton ang World Boxing Union (German version) cruiserweight belt niadtong Pebrero 8, 2018 didto sa Pensacola Civic Center sa Florida.
Atol sa 31 ka tuig na niyang karera, si Jones nakakulit og 66-9 win-loss record uban ang 47 knockouts, samtang si Tyson nagbitbit og 50-6 nga baraha uban ang 44KOs.
- Latest
