Kalei Mau balik Amerika sa 2021?

MANILA, Philippines — Plano ni Filipino-American Kalei Mau na magbalik sa Amerika sa susunod na taon kaya’t malabo nang makapaglaro pa ito sa 2021 Southeast Asian Games sa Vietnam.

Ito ang inihayag ng 6-foot-2 wing spiker matapos lumabas ang mga ulat na isang professional league sa Amerika ang magbubukas sa 2021 season.

Miyembro si Mau ng United States Volleyball Association (USVA) kaya’t legal itong maglaro sa commercial league sa Amerika.

Sa katunayan, ito ang dahilan kung bakit hindi nasilayan sa aksiyon si Mau noong 2019 SEA Games sa Maynila.

Kailangang i-withdraw ni Mau ang membership nito sa USVA at magkaroon ng two-year residency sa Pilipinas bago tulu­yang makapaglaro sa SEA Games.

Subalit sa ngayon, wala pang balak na tanggalin ni Mau ang kanyang koneksiyon sa USVA dahil target nitong subukan ang kanyang kapalaran sa Amerika.

“There’s a professional league starting up in the US next year, hopefully it would go well. I’m still a USA volleyball player and that would be such a great opportunity,” ani Mau.

Dahil dito, malabo munang masilayan sa aksiyon si Mau suot ang national team jersey sa mga international tournaments gaya ng SEA Games at Asian Games.

Malaking tulong sana si Mau para mapalakas ang national team kasama sina Alyssa Valdez, Jaja Santiago at Dindin Santiago-Manabat gayundin ang kapwa Fil-Am nitong si Alohi Robins-Hardy na posibleng magbalik-Amerika rin.

Inaasahang tatapusin muna ni Mau ang kontrata nito sa F2 Logistics bago tuluyang lumipad pabalik sa Amerika.

Noong nakaraang taon, tinulungan ni Mau ang Cargo Movers na mabawi ang Philippine Superliga All-Filipino Conference kung saan itinanghal itong MVP.

Nais muna ni Mau na isentro ang kanyang atensiyon sa pagtulong na muling makasungkit ng korona ang Cargo Movers.

Wala pang anunsiyo ang PSL kung kailan magbabalik-aksion ang liga.

Magugunitang natigil ang PSL Grand Prix noong Marso dahil sa coronavirus disease (COVID-19) pandemic.