Marcial, mga empleyado ng PBA sasailalim sa COVID-19 testing

MANILA, Philippines — Kasama si Philippine Basketball Association Commissioner Willie Marcial, nakatakdang sumailalim ang 40 regular employees ng liga sa novel coronavirus disease (COVID-19) testing.

Ipinaalam ni Barangay Ginebra board of governor at San Miguel Corporation sports director Alfrancis Chua kay Marcial ang nasabing inisyatibo ni SMC president Ramon S. Ang.

“Pinapaabot namin ang taos-pusong pasasalamat kay SMC president Ramon  Ang sa malaking tulong na kanyang ibinabahagi upang matiyak ang kalusugan at kaligtasan ng mga empleyado ng PBA,” wika ni  Marcial kahapon.

Gagawin ang COVID-19 testing sa San Miguel headquarters sa Ortigas.

Magtatakda ang PBA Management Committee ng mga protocols na susundin kapag muling ibinalik ang regular operations.

Isa ang SMC sa mga kompanyang sumusuporta sa paglaban ng gobyerno sa COVID-19.

Kamakailan ay nagbigay ang SMC ng mga testing booths at testing kits sa lahat ng 17 local government units (LGU)s sa National Capital Region para palawigin ang testing capacity ng bansa.

Nag-donate rin ang SMC ng RT-PCR testing machines at automated RNA machines sa ilang government hospitals.