Mau nanganganib mawala sa Philippine team
MANILA, Philippines — Nanganganib na mawala si Filipino-American outside hitter Kalei Mau sa national team na sasabak sa 2019 Southeast Asian Games na lalarga mula Nobyembre 30 hanggang Disyembre 11.
Hindi pa nakakakuha si Mau ng release paper mula sa United States Volleyball Association para pahintulutan itong makalaro sa ilalim ng Team Philippines.
Kaya naman binigyan si Mau ng ilang linggo para makuha ito at pormal na mapasama sa national team.
Sakaling hindi ito makakuha ng release papers, walang magagawa ang Larong Volleyball ng Pilipinas Inc. (LVPI) kundi alisin ito sa koponan at palitan.
Kumpiyansa naman ang LVPI na mananatiling malakas ang tsansa ng Pilipinas na makapasok sa Top 3 sa kabila ng pagkawala ni Mau.
Nariyan sina Alyssa Valdez, Jia Morado, Mika Reyes, Rhea Dimaculangan, Eya Laure, Abigail Maraño, Mary Joy Baron, Maddie Madayag, Roselyn Doria, France’s Molina, Aiza Pontillas, Mylene Paat, Jovelyn Gonzaga, Dawn Macandili at Kathleen Arado para magtulung-tulong upang makipagsabayan sa mga karibal nito.
Una nang nawala sa koponan ang Santiago sisters na sina Jaja at Dindin na parehong naglalaro sa commercial league sa Japan.
Natanggal din si Filipino-American Alohi Robins-Hardy dahil sa problema sa kanyang passport.
Apat na koponan lamang ang maglalaro sa women’s volleyball competition sa SEA Games – ang defending champion Thailand, silver medallist Vietnam at bronze winner Indonesia.
- Latest
