Howard balik sa Lakers, mipirma na og kontrata

CEBU, Philippines — Human sa usa ka semana nga negosasyon, nakakab-ot na gyud og kasabotan si kanhi NBA star center Dwight Howard ug ang Los Angeles Lakers.

Ang eight-time All-Star nga si Howard mobalik sa Lakers human mipirma og kontrata ug wala kini modayon pagbalhin sa Memphis Grizzlies nga unang nakakuha kaniya gikan sa Washington Wizards  pinaagi sa trade.

Nasayran, nga si Howard usa sa mga bigmen nga giduol sa Lakers aron tanyagan og usa ka tuig nga kontrata  human ma-injured ang tiil ni DeMarcus Cousins atol  sa practice. Si   posibleng dili na kaduwa sa tibuok 2019-2020 season sa NBA.

Ang 33-anyos nga si Howard niduwa sa Lakers niadtong tuig 2012 ug 2013 diin siya mi-average og kapin sa 16 puntos sa tibuok season. Bugnaw kaayo si Howard uban sa Lakers niadtong higayona tungod kay wala sila magkasinabot sa superstar sa koponan nga si Kobe Bryant.

Karon, ang 6-foot-11 nga si Howard adunay tsansa nga mamawi ug ipakita nga usa gihapon  siya ka premyadong sentro sa liga sa iyang pagduwa uban sa duha ka superstars nga sila si LeBron James ug Anthony Davis.

Gawas sa iyang abilidad sa depensa, makatabang usab sa Lakers ni coach Frank Vogel ang kasinatian ni Howard. Si Howard adunay usa ka finals appearance niadtong 2008 uban sa Orlando Magic, apan napilde sila sa Lakers sa finals. 

Si Howard usa sab ka kanhi three-time Defensive Player of the Year.