Jones may purohan makabalik sa NBA, gipangulitawhan siya sa Rockets
CEBU, Philippines – Dako'g purohan nga makabalik sa NBA si PBA Best Import Terrence Jones Jr. dihang giduol siya sa kadagkoan sa Houston Rockets, apan andam siya nga moduwa sa TNT KaTropa sa sunod tuig kon ugaling adunay oportunidad.
Ang Rockets gikataho nga interesado mokuha ni Jones isip bench players sa sunod season sa NBA ug may tsansa siya nga moduwa uban sa superstars nga sila si James Harden ug Russell Westbrook. Si Jones mipakita sa iyang abilidad diin gipangulohan niya ang TNT nga moduwa sa finals batok sa San Miguel Beermen sa PBA Commissioner's Cup.
Gawas sa iyang abilidad, misikat si Jones sa mga Pinoy fans dihang nabiktima siya sa pagbugal-bugal ni Beermen forward Arwind Santos, kinsa misenyas kaniya og 'onggoy'.
Bisan pa niini, si Jones miingon nga duol kaniya ang PBA ug dili siya magpanuko pagbalik sa liga kon bakante siya sunod tuig. "I loved being in the Philippines! I loved the people and y’all as a country! I will be back!!," matud pa ni Jones sa iyang social media account.
- Latest
