Team East, pangdan nanghawod sa naga SK Cup

CEBU, Philippines – Ang Team East ug Pangdan mikadlit og kulbahinam nga daog batok sa ilang mga karibal aron langkaton ang kampiyonato sa tagsa-tagsa nila ka mga dibisyon sa City of Naga Sangguniang Kabataan (SK) Cup Inter-Barangay Basketball Tournament didto sa Enan Chiong Activity Center sa Dakbayan sa Naga habagatang bahin sa Sugbo.

Si John Bryll Ravanes maoy nangu sa upat ka players nga miposte og double figures uban ang 20 puntos sa dihang ang East nakaeskapo batok sa Tuyan, 91-88  aron sakmiton ang korona sa seniors division.

Sila si Marl Vhie Delantes ug Joseph Mhelan Muller nagkumboya og 27 puntos, samtang si Rudolph Hamoy midugang og 11 puntos alang sa East.

Alkansi og singko puntos sa halftime, 35-40, ang East miresbak aron pagtabla sa iskor, 75-75  ug dayon milusad og solidong salida sa naghinapos nga bahin sa duwa aron pakgangon ang Tuyan.

Si Michael Candia mipabuhagay og 26 puntos, apan nakawang ang iyang paningkamot alang sa Tuyan.

Sa laing duwa, si Shylmar Canonigo mipabuto og 29 puntos sa dihang gitumba sa Pangdan ang South, 84-78 aron labnihon ang titulo sa juniors division.

Sila si Jhun Fil Alinganga ug Gibb Canonigo nagkumbinar og 22 puntos alang sa Pangdan nga alkansi og dos puintos sa halftime, 37-39.

Apan ang Pangdan init nga nanimawos sa ikatulong kuwarter aron sa pagkontrolar niini sa duwa human sa tulo ka kuwarter, 63-60. 

Wala na molingi pa sukad niadto ang Pangdan aron pag-angkon niini sa tam-is kaayong sayes puntos nga kadaogan.

Si Charles Olcen Omambac mibahog og 23 puntos sa pilderong South.