Gasol gustong magpabilin sa raptors

CEBU, Philippines – Gidawat sa sentrong si Marc Gasol ang $25.6 million niyang suholan sa nahibilin niyang usa ka tuig nga kontrata aron magpabilin sa NBA champion Toronto Raptors sunod season.

Mismo ang Toronto management ang mipahibalo niining maong kalamboan.

Si Gasol nga nakuha sa Raptors gikan sa Memphis Grizzlie pinaagi sa usa ka trade sa miaging  season, mi-average og 9.4 points, 6.4 rebounds, 3.0 assists ug 1.1 blocks atol sa playoffs.

Dako siya og natabang sa Raptors   paglangkat niini sa labing una nilang korona sa 24 ka tuig nga kasaysayan sa ilang prangkisa.

Mao kadto ang labing unang higayon nga ang 34-anyos nga si Gasol nakatilaw og titulo sa 11 ka tuig niyang karera sa NBA.

Ang 2013 NBA Defensive Player of the Year nahimo sab nga NBA All-Stare tulo ka higayon ug gitabangan ang Spain ngadto sa usa ka Basketball World Cup title ug duha ka Olympic silver medals.